الخميس 20 سبتمبر 2018 - 12:30 صباحاً , 10 محرم 1440

حديد المصريين أعلى الصفحة


 

 

   سلّم نفسك!

    الخميس 08 مارس 2018 07:26 مساءً

    محمد أمين

 

هل يمكن أن تسلّم نفسك بمزاجك لأى أحد، وأنت آمن؟. هل يمكن أن تسلم نفسك لامرأة بما أننا فى اليوم العالمى للمرأة؟.. فمن هذه المرأة بالضبط؟.. هل هى زوجتك؟.. أم حبيبتك؟.. أم هى أمك فقط؟.. فى أدبياتنا لم يحدث أن سلم أحد نفسه إلا للبوليس أو النيابة.. إليكم تفاصيل «الخناقة»:
 
■ هى: ممكن تخليك رومانسى وتحكيلى حكايتك وإنت مغمض عينيك؟!
 
- هو: أيوه بقى.. يعنى إيه أحكى حكايتى وأنا مغمض؟!
 
■ (هههههه) يعنى سيب نفسك شوية.. وسيب عقلك على جنب!
 
- آه أعترف يعنى.. أقعد على كرسى الاعتراف!
 
■ مش أوى كده.. يا حبيبى اتكلم علشان أعرفك!
 
- طب ما هو ده عامل زى تحقيقات البوليس والنيابة!
 
■ يا حبيبى انس بس الجو البوليسى.. وخليك رومانسى!
 
- طيب.. ما إحنا قاعدين قعدة حلوة.. مفيش رومانسية بعد كده!
 
■ لأ.. عاوزة أعرفك.. ماضيك حاضرك مستقبلك.. أنفاسك!
 
- (هههه) ده ولا حصار قطر.. أنفاسى كمان؟!
 
■ كل حاجة مش إنت حبيبى؟.. تبقى إنت ملكى!
 
- عارفة.. المشكلة إن كل واحدة عرفت واحد افتكرت إنها تملكه!
 
■ طب وفيها إيه؟.. إلا إذا كان عاوز يلعب بديله وعينه زايغة!
 
- بس فكرة الامتلاك بتخنق.. وبعدين أنفاسك إيه وملكى إيه؟!
 
■ (لحظة صمت).. طب نرجع تانى رومانسيين وحلوين.. ماشى!
 
- رومانسية إزاى فى جو بوليسى... تحقيقات واعترافات وحبس!
 
■ خلاص خلاص.. مش عاوز تحكيلى براحتك.. كنت بحاول أقرب منك!
 
- يا بنت الحلال.. خلّى كل حاجة تيجى براحتها.. هتبقى طبيعية!
 
■ هو إنت شايفنى المحقق «كرومبو»؟.. أنا كنت عاوزة أسمعك!
 
- طيب نتفق بلاش كلام عن الماضى.. خلينا فى بكرة!
 
■ (إتقمصت) براحتك.. أنا غلطانة كنت عاوزة أشاركك كل حاجة!
 
- تعرفى ده الفرق بين بنت شرقية وبنت غربية!
 
■ ما لها بقى الشرقية؟.. «بقت كخة دلوقتى»؟!
 
- (هههه.. إديلو).. لأ حقيقى، الشرقية عاوزاك بشروطها!
 
■ طب ومالو؟!.. دى عشرة عمر.. مش هى دى الشركة؟!
 
- مش أوى كده.. لازم مساحة للتنفس والحركة!
 
■ حركة فين؟، تلعب بديلك يعنى؟.. تتنفس فى بيتك يا نغّة!
 
- (ممممم) ديل إيه ونغّة إيه؟.. إنتِ قلبتِ بلدى كده ليه؟!
 
■ ماله البلدى؟.. شروط إيه؟.. إظهر على حقيقتك!
 
- يعنى عاوزاك كريم ومجدع.. وعاوزاك «حمل» وعاوزاك «أسد»!
 
■ مفيهاش حاجة.. عاوزاك فتى أحلامها.. كفرت؟!
 
- لأ.. (يقوم) عاوز إخلاء سبيلى من سراى النيابة!
 
■ والنبى يا حيلة أمك؟.. هو دخول الحمام زى خروجه؟!.
 

 

أوليكس

 

التعليقات

 

 
 



إذاعة القرآن الطريم

مقالات رئيس التحرير
رمضان كريم 1

مع الرحمة

التعمير والاسكان

هل توافق على مشروع قانون لمعاقبة الوالدين المهملين لأطفالهما بالسجن 10 سنوات؟

  نعم

  لا

  لا أهتم


نتائج

أضف  البريد الالكتروني :
 
 

 

أضف  كلمة البحث :
 
 

 
 
 

الاعلامي ملهم العيسوي في ضيافته الدكتور عصام الروبي 1-8-2018